政壇：廠商會立會席位多人爭
眾所周知，中華廠商聯合會改選會長喺前日落幕，最終由李秀恒勝出。呢次選舉代表廠商會新舊勢力消長，兩陣營喺選舉過後能否大團結仲未知，但外界已將焦點放落一六年廠商會立法會代表人選上。現任議員林大輝走人幾乎已成定局，聽聞現任會長Irons施榮懷同副會長Jimmy吳永嘉都有興趣問鼎立法會，唔知李秀恒正式出掌會長一職後，有無影響兩人嘅行情呢？
廠商會下屆立法會代表要由施子清（右）及盧文端（左）出面砌掂？（資料圖片）
眾所周知，Irons嘅爸爸施子清同埋Jimmy嘅外父盧文端係結拜兄弟，如果兩位後生嘅爭持不下，勢必影響兩家人感情，所以預計老人家唔會令到局面搞到咁僵，應該會坐低傾掂佢。我哋尋日問過盧文端，佢就哈哈笑咗幾聲，話現時言之過早，而且議席一職唔係佢話邊個做就邊個做，主要視乎一眾廠商會會員意願喎。
除咗施、吳二人，以李秀恒為首嘅新勢力亦不容忽視，有廠商會中人認為，李派中以飲食界黃家和呼聲最高，但亦要留意李秀恒有無興趣親自上陣，未來肯定好戲連場。
