政壇：吳得掂難避梁美芬挑機
被嘲為「吳得掂」嘅教育局局長吳克儉喺前年七月加入現屆政府後，表現屢受批評。局內傳同教育局常任秘書長謝凌潔貞鬧不和，局外亦被外界多次質疑，包括前年處理反國教時進退失據，最近大專生罷課時佢剛好離港，被指留下爛攤子畀局內高層官員「執手尾」，最新就連中學嘅通識科都畀建制派中人連番「挑機」，當中立法會議員梁美芬更度出新招，就係計劃聯同關注團體邀請吳得掂作答通識科試卷！
設計圖片及對白
或邀退休校長監考
佔領行動持續逾月，外界視之為市民對政治嘅醒覺，建制派同一時間金睛火眼（目及）實中學嘅通識科，梁美芬尋日率先出招，透露計劃整份通識科試卷出嚟，加上會營造一個類似考場嘅場景，邀請具公信力或退休校長監考，睇吓吳得掂、考試及評核局秘書長唐創時等人到時會答乜答案喎。
梁美芬出招乾淨利落，依家球喺吳得掂等人一方，睇吓佢哋敢唔敢應戰，之不過，無論係應戰抑或官腔回應了事，梁美芬對通識科嘅關注度，似乎部署多時。事關梁美芬曾倡議要檢討通識科必答政治題嘅必要性，加上最近考評局出版今年中學文憑試通識科考試報告，指有學生錯誤將法治等同執行法例，梁美芬已開腔要求考評局澄清報告有關考生掌握「法治」概念嘅評語，吳得掂對於梁美芬等人對通識科嘅步步進逼關注，似乎避得今次，下次都未必可以避得過嘞！
