全民退保無人理 安老無計嘆奈何
不到香港，不知文革還在搞。今時今日嘅香港，全城陷入政治狂熱，日日嘈喧巴閉，反而民生問題無人關心。好似同全港打工仔息息相關嘅全民退休保障計劃咁吖，提出至今石沉大海，講起實在可悲。
香港人口老化加快，弊在強積金制度千瘡百孔，三條安老支柱形同虛設，好多打工仔臨老過唔到世，呢啲都係實情，不聞不問唔等如安老問題唔存在嘅。尋日港大社科院舉行辯論大會，邀請行會成員、立法會議員、學者及其他界別持份者就全民退保畀意見，得出兩大共識，包括現時社會大部分人老無所依，同埋港府嘅老人政策天殘地缺。最後嘅結論係，雖然社會對推行覆蓋全民嘅「隨收隨支制度」仍有分歧，但認為分歧唔難解決，政府唔應該迴避全民退保喎。
講真，有人肯認真討論問題梗係好啦，不過咪畀太一叮批中，呢啲都係煲冇米粥咋。莫講話港府本身愛理不理，一味推卸責任，就算有心做嘢都無能為力喇。鬼咩，佔領行動沒完沒了，早已搞到天怒人怨，但搞手仲火上加油，堅持要上京「對話」喎，慌死自己做唔成英雄咁款。咁仲唔止，反對派議員「裏應外合」，喺議事堂大搞不合作運動，拉布流會當食生菜。議會癱瘓，政府空轉，社會停擺，民生問題咪慘成犧牲品囉。
政客無良，一啲冇講錯o架，佢哋之前大聲疾呼要求當局盡快推行全民退保，「為民請命」嘅姿態呃咗唔少人o架，依家報告出咗喇，佢哋竟然不屑一顧，棄如敝屣。呢，最近反對派提出更改「遊戲規則」，要由佢哋決定邊項議案傾先，邊項議案押後喎。你話嘞，反對派處心積慮搞奪權，邊係做正經嘢吖。
所以話啫，家陣嘅香港，街頭有街頭嘅亂，議會有議會嘅廢，政府有政府嘅渣。唔怪得負責撰寫全民退保報告嘅港大學者周永新心都淡喇，慨嘆全民退保已經失焦，自己嘅心血白費。老實講，全民退保講足二十年，家陣先至稍有眉目，如果因為政治問題而被束之高閣，最終受害嘅咪又係基層市民。
唉，講起就心噏喇，以前香港號稱福地，風調雨順，社會和諧，近年唔知交上乜嘢衰運，一味內鬥內耗，搞到經濟停滯，民生凋敝，競爭力每況愈下。市民除咗望天打卦，仲可以點做呢？唔通政治真係可以當飯食？叮！
