城中鏡：銀袋日拉頭馬 郭少明喜事多
沙田馬場前日舉行「婦女銀袋日」盃賽，令好多因佔領行動而久未露面嘅名媛淑女空群出動。贊助盃賽嘅莎莎國際主席郭少明一向將盛事當成自己「BB」，咁蹺當日亦係佢女婿Davis陳振邦生日，郭家上下切完蛋糕再為愛駒拉頭馬，喜事連場。
郭少明（右二）同太太郭羅桂珍（右一）、郭詩慧（左二）同老公陳振邦（左一）盛裝出席「婦女銀袋日」盃賽盛事。
林黃寧艷奪得最佳服飾大獎亞軍。
雷禮權（左）同太太利蘊珍（右）以半西部牛仔造型現身馬場。
婦女銀袋日嘅賓客「奉旨」佩戴靚帽爭妍鬥麗，主人家郭太羅桂珍無懼陣陣涼風，着上訂製的孔雀長裙，大騷玉背。郭太咁風騷係有原因，事關當日除咗賀盃賽，仲係女婿牛一，莎莎太子女郭詩慧起初忙於招呼賓客，裝作若無其事，中場時段突然送上五磅重iPhone蛋糕，畀老公一個驚喜。Davis話：「太太一定係想我少啲玩電話，多啲同佢溝通。」太太識做，Davis都回敬一份心意，今年會努力「造人」，望再添一個BB。
日圓急跌 吸引買「磚頭」
日圓急跌，低處未算低，吸引唔少名人去日本瘋狂掃貨。九巴後人雷禮權之前先去完東京，下周又再出發買衫。佢仲同幾位法國朋友計劃投資當地房地產，喺二世古一帶購入平房後重建成住宅出售，單係收租，每年回報高達十二厘，咪話唔吸引。講到買日本「磚頭」，大家樂集團主席陳裕光都話吼咗好耐：「我兩、三年前已關注當地樓市，事關日本經濟衰退咗十幾年，係時候大反彈。」依家日圓再插水，更加想入市喎。
愛沙尼亞駐港名譽領事林建康太太黃寧艷就鍾意去日本品嘗美食，大阪、北海道係佢首選，又會購入別致飾物，但係佢擔心東京輻射餘波未了，暫時未敢去住。
