SUN搞作：打橫嚟講：去政治化通識 靠得住
嗱！事先聲明呀！本人最討厭政治。
喺一個撕裂嚴重的小島上，畀那個管治無方的廢柴政府靠那渣手段搞分化嚟掩飾欺下瞞上之劣績，還好得逞喎！咁！我哋仲點會鍾意政治呀！加上，有學者做的調查報告，指出愈有學識的，愈和平理性和支持民主；愈低水平的，愈狂躁粗暴和愈撐薑蓉反佔中。老老實實，我好和平理性同愛民主o架！
呢度撕裂分化到乜嘢程度呢？就係連那些以前曾極力主張推行通識教育的疾草們，今天自摑嘴巴，話要「取消」通識教育喎！
栽培學子有獨立思想和多角度看事物的通識教育，有乜麻煩呢？看兩個實例先吧：
一班小學生到警察博物館參觀，行到一個警察模型前，導賞員話：「警察叔叔的工作好辛苦o架！身上的裝備好重嗰喎！你哋知唔知佢哋每日要帶住啲乜嘢當更嘅呢？」同學A答：「胡椒噴霧同催淚彈……」
動L！
另一單，小學常識測驗，試題問：「為甚麼香港樓價近年有升無跌？列舉兩個原因說明。」同學B寫：「因為地產霸權和大陸土豪貪官的黑金來港炒貴晒！」派卷，被老師紅筆打了兩個大交叉，正確得分答案，係：「地少人多和人口膨脹」！動L！二十年前的標準答案，今日仲啱用？
當一眾自摑三巴的社會賢達大力媽叉通識教育教壞香港學生時，喺「今日香港」這環節內，我本好想問一條政治正確的問題：「清場可以徹底解決香港的政改問題嗎？」但礙於本人討厭政治，遂我改一條去政治化的「科學、科技與環境」題：「點解臭罌一定出臭草嘅？」有無靠得住的答案，賜教細佬？
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
