政壇：搞搞政：謝偉俊求保議席望胡志偉贏選票

建制派喺九東只取得四成選票，但五個議席中竟攻下三席，好大程度同泛民內訌「自相殘殺」有關。話說兩位激進派參選人社民連陶君行同黃洋達，分別取得兩萬七千幾票同三萬六千幾票，阿Paul只係比黃洋達多二千票左右當選，換句話說若阿陶棄選，激進派勢力票源隨時過戶至黃洋達，阿Paul可以打定輸數。

「操盤人」下令建制派唔好主攻

聽聞阿Paul都收到風，阿陶下屆未必再參選，咁無咗佢幫手分薄票源，可以靠邊個？有熟悉九東地區形勢人士話，白鴿黨近年喺九東不斷跌票，由高峰期前議員李華明嘅六萬票，到胡志偉擔正後得番四萬幾票，如果下屆票源繼續萎縮，只會益咗激進泛民黨派。

所以目前只得兩個情況係對阿Paul最有利，一係胡志偉狀態回勇，最好取逾五萬票，此消彼長下，黃洋達就未必咁易取代阿Paul嘅末席位置。而另一個情況就係讓黃洋達擊潰胡志偉，等胡志偉得票仲低過阿Paul。

但係呢個結局不利建制派，聽聞「操盤人」都唔想黃洋達呢類激進勢力抬頭，所以一直都算錫住胡志偉，包括下令叫建制派唔好主攻胡嘅地區樁腳，留佢一條生路，藉此保住阿Paul個議席。不過，一切都只係紙上談兵，選舉點會咁理想，阿Paul都係自求多福好過。