政壇：張國柱抱病照主持會議
話說立法會社福界議員「阿柱」張國柱早前被確診患上胃黏膜淋巴瘤，要向立法會主席申請放兩個月假接受電療，預料最快都要到明年初先至可以復工。不過，應該放假休養緊嘅阿柱尋日竟然返去立法會，主持由佢出任主席嘅福利事務委員會會議。雖然阿柱面色較為枯黃，身形亦較以前瘦削，但佢仍然中氣十足咁主持會議，絲毫唔覺得有異樣。
抱恙嘅張國柱（右一）尋日仍然現身立法會主持福利事務委員會會議。
表現同平時無分別
本來喺福利事務委員會開會前，秘書處已經同工聯會陳婉嫻講，可能要佢代阿柱主持會議，正當嫻姐想「臨危受命」時，阿柱就行咗入會議室，話自己精神尚算唔錯，可以主持會議。兩小時會議上，阿柱就好似平時咁主持會議，有時仲會叫出席官員就政策解釋得清楚啲，同平時嘅表現完全無分別。
見到阿柱抱病在身仍然堅持開會，其他委員都好關心佢嘅情況，完會後更加紛紛上前慰問，阿柱就繼續以一副樂觀嘅態度回應。不過，阿柱喺會後隨即返屋企休息，等候主持下月嘅會議。
