政壇：青峰會盼聽後生仔心聲？
由「九二八」開始嘅佔領行動已持續個多月，但仲未有退場嘅迹象，咁多學生同年輕人參與呢個行動，暴露咗政府過去多年嚟未有好好處理青年人問題，但偏偏主打青年議題嘅論壇，接連因為佔領行動而延期。
設計圖片及對白
繼香港菁英會舉辦嘅「博鰲青年論壇」因佔領行動而延至明年五月舉行後，民政事務局同青年事務委員會每隔幾年就會舉辦嘅「青年高峰會議」，亦由本月底延至明年第一季舉行。過咗佔領行動先至舉行青年論壇，會唔會錯失咗好時機呢？
為咗增加對青少年嘅支援，「青年高峰會議」每隔一至兩年就舉辦一次，等青年人可以就關注嘅課題向政府官員同嘉賓表達意見。但由於佔領行動至今仍未有結束迹象，籌備委員會於是押後至明年首季舉行。青年事務委員會主席Bunny陳振彬話，由於參加佔領行動嘅多數係年輕一代，如果要有效解決青年人問題，就一定要親自聽聽佢哋嘅聲音。
唔怕邀請雙學出席
自從佔領行動爆發以來，Bunny亦落過幾次佔領區同後生仔傾偈，了解佢哋對政府同各項政策嘅睇法，再將幾次落區嘅經驗同籌備委員會其他委員分享。正因為籌備委員會想盡量聽取更多後生仔嘅意見，佢哋於是決定押後高峰會，以調整各項活動項目及安排，務求令高峰會議可以更加切合青年人嘅需要，令青年高峰會議可以取得更大成果。
既然Bunny講到明想聽後生仔意見，不妨考慮邀請學聯同學民思潮成員出席研討會，等佢哋可以直接向官員表達青年人嘅訴求，相信到時一定會好精彩。Bunny就話，最驚佢哋唔嚟咋！
