叫學生上京衝擊 淫賤黎心腸歹毒
江山易改，本性難移，人稱「淫賤黎」嘅壹傳媒主席黎智英日前煽動學生趁亞太經合組織會議開會期間上京抗爭「博拉」，催谷五十萬人上街，結果冇人聽佢支笛，於是繼續落嘴頭，慫恿學生上京衝擊喎。呢啲咪叫唯恐天下不亂囉。
係人都知，淫賤黎係佔領行動嘅幕後黑手兼金主，佢由幕後走到台前，日日喺金鐘佔領區個「私家皇座」扮指揮，指手畫腳，煽風點火。不過咁，學生明知上到京都係得個吉，仲分分鐘有去無回，於是臨陣退縮，決定押後上京，要求全國政協副主席董建華協助安排與中央官員會面。點知淫賤黎居然發爛渣，聲稱唔知學聯點諗喎，仲話「既然係衝擊，最大衝擊係最好囉，等APEC進行嘅時候，甚至奧巴馬喺度嘅時候最好囉」。
淫賤黎勾結外部勢力禍亂香港，已經係公開嘅秘密，問題係，既然佢講到自己咁大仁大義，點解唔身先士卒上京博拉呢？點解唔親自喺奧巴馬面前衝擊呢？有立法會議員就鬧得啱嘞，「無良心」已經不足以形容淫賤黎，佢直情係「喪心病狂，非常黑心」。
老實講，北京唔係香港，點可能任由班學生為所欲為，無法無天吖。淫賤黎明知不可為，仲要煽風點火，講得好聽係利用學生嘅理想同激情，講得難聽根本係利用學生嘅無知同狂妄，即係叫人去送死咁解，如果學生咁都上當，咁就唔止係太傻太天真，簡直係太蠢太白癡喇。
有人可能會問，點解淫賤黎咁黑心，唯恐天下不亂？答案其實好簡單，無論香港點樣混亂，佢都唔會有損失。呢，有網民踢爆淫賤黎早已將大部分資產轉移到海外，喺英國、法國及日本都有物業，反而喺香港只係租屋住，連「根」都冇，隨時準備走佬。難為班學生畀人利用做炮灰，仲以為自己係民主鬥士，講起真係可悲。試諗吓，繼續搞落去，香港只有死路一條，淫賤黎等幕後黑手就話可以逃去海外做寓公啫，學生又點吖？七百萬市民又點吖？
不過咁，人在做，天在看。淫賤黎搞風搞雨，禍港殃民，早就淪為過街老鼠，日前有人喺銅鑼灣波斯富街對開告士打道行人天橋懸掛橫額，指摘淫賤黎係「賣國賊」、「禽獸不如」、「賣港求榮」，講出好多市民嘅心聲。慶父不死，魯難未已，港府幾時至肯依法辦事，將佔中黑手繩之以法呢？
