政壇：搞搞政：鍾國斌護業界怒轟葉劉
新民黨主席葉劉淑儀早幾日話，本港的紡織及製衣界嘅重要性已經今非昔比，建議將該界別提委會嘅席位撥啲畀其他界別，事件隨即引起代表紡織及製衣界嘅鍾國斌重視，尋日發表一篇措詞好火嘅新聞稿，既對葉太言論深表遺憾，又以無知、外行回應對方，真係火藥味十足。
設計圖片及對白
指「外行人」無知
新民黨同鍾國斌所屬嘅富貴黨都以中產為定位，選舉票源相約，早前田北俊被褫奪全國政協委員資格及辭去黨魁一職後，葉太已隨即打開口牌，話有意挖富貴黨員過檔，而且，兩黨在近期佔領行動上都高調撐警隊，競爭之勢濃烈。
所以，鍾國斌尋日還火，掀起論戰，鍾批評葉太言論完全唔符合實際情況，無視業界對香港作出嘅巨大貢獻，更呼籲葉太下次發表同產業發展、商業運作有關嘅言論前，應虛心請教業界，以免作出錯誤同無知嘅建議。葉太就反駁話，佢嘅言論並冇抹殺呢個業界嘅貢獻，亦無取笑成分，只係業界嘅生產、品質控制等範疇已轉移到境外，喺選委會中「係咪需要十八票咁多呢？」鍾國斌則話，葉太過去從沒有在商界工作，其言論反映佢對業界發展一竅不通，外行人講外行話。葉太都唔抵得，反問鍾國斌又為業界做過啲咩？選委爭拗戰提前揭幕，政圈口水仗有排打囉。
