政壇：邱金榮盼佔旺結束再開舖
匯聚中式餐飲才俊的「稻苗學會」，日前舉行新一屆執委就職禮，叙福樓集團執董黃傑龍（Simon）卸任，交棒畀新主席邱金榮（Kelvin），Simon「升呢」做會長，佢笑言飲食界正值多事之秋，單係佔領行動已重創飲食界，有必要幫吓手喎。新主席Kelvin上任亦百感交集，皆因旗下生意受佔領行動影響。
黃傑龍（右）交棒畀新主席邱金榮（左），黃就升呢做會長，繼續為「稻苗」効力。
Kelvin喺旺角區開咗十六年嘅米線店在十月底結業，街坊都話唔捨得，尤其係班拔萃男書院學生，得悉店舖要結業，拉埋老師齊「救亡」，仲話要集資救間店，但米線店最終難逃結業命運，Kelvin話好感動，期望佔領行動盡快完結，再捲土重來。
就職晚宴上，激瘦二十磅嘅香港餐飲聯業協會會長黃家和（Simon）亦有現身，佢大病初愈，但早前已帶隊考察法國及意大利，趁機狂掃冬裝。Simon話，病後身形縮水，衣櫃的加大碼衫已經唔啱着，睇見米蘭咁多名牌，買到唔停得手。米蘭「筍貨」仲有平樓，約一百萬港元就有交易，Simon都話心癢癢想買番間喎。
