佔領行動撕裂社會，連一啲專業團體都不能幸免，醫學會會長史泰祖早前否決就業界對佔領行動立場進行民意調查，仲因為呢件事，同支持展開調查嘅前會長蔡堅反面。尋日，史、蔡二人齊齊着黑色西裝去到金鐘佔領區，為該會下期以佔領行動為主題嘅會刊影相，雖然佢哋兩人全程保持微笑，但影相過程卻完全零交流，可見二人關係仲未解凍。

史泰祖（中）、蔡堅（右）等喺豎立住「光明磊落」大字嘅佔領區前合影。

拍攝過程中，攝影師為佢哋影握手相時，史泰祖同蔡堅中間就夾住另一名醫生，結果張相變咗三個大男人握握手、氹氹轉，場面都咪話唔尷尬。拍攝完畢後，在場記者又邀請史泰祖同蔡堅一齊接受訪問，但蔡堅就趁史泰祖答緊問題時，靜靜雞走人。正如史泰祖話齋，呢場佔領行動唔單止令社會撕裂，仲令佢同蔡堅嘅幾十年交情撕裂。

第一手消息請下載on.cc東網iPhone/iPad/Android/Windows Phone Apps