政壇：四點鐘許Sir率先撤離
佔領行動昨踏入第四十二日，三個佔領區嘅示威者逐漸減少，而佔領行動以來，吸引不少市民留意嘅「四點鐘許Sir」安排，亦暫別觀眾。警察公共關係科（PPRB）尋日宣布，警方每日同消防處舉行嘅聯合記者會，即每日下午四點鐘舉行嘅例行記者會，會作改變，呢個記者會將會喺有需要嘅時候先舉行，換言之，PPRB一哥許鎮德卒之可以從四點檔鬆綁喇。
設計圖片
感觸時局爆肚望包容
人稱許Sir嘅許鎮德自執掌有關記者會以來，憑淡定表現、獨特嘅英語發音，同埋每日將講稿「Recap in English」等特色言行，迅速引起市民注意，更在網上爆紅，有網民更發起「四點鐘許Sir群組」，人數最高峰時多達五萬人，爭相討論許Sir，以至群組上幾乎日日洗版。
對於成為網絡紅人，令到大家關注警隊處理佔領行動，許Sir話呢個實非佢所料，亦都唔係佢一個人嘅功勞，而係成個警隊在背後支持佢。佢話，每日開記者會，目的係要講解受佔領行動對交通情況同對緊急服務嘅影響，仲要澄清失實同無理嘅指控，加上記者尖銳嘅提問，非常具有挑戰性，令到佢有時都幾緊張。
曾經喺記者會上引歌詞、講無悔警隊工作嘅許Sir又話，有時睇到示威者鬧同袍係黑警、魔警等侮辱字眼，真係好心痛，自己亦係香港土生土長，對於香港變成咁，有時都有感而發，爆番兩句肚，希望大家包容。
許Sir仲話，雖然聯合記者會今後未必日日舉行，但佢仍然會每日返辦公室，朝早開始要睇晒全港報紙，掌握吓唔同佔領區嘅情況，在有需要嘅時候再同大家見面喎。
