引路徑損壞易絆途人
居於彩雲邨的伍先生指出，近年發現彩雲商場平台上的觸感引路徑經常脫落損壞，維修後不久又會脫落，令引路徑變成斷截禾蟲，「成日都爛，都唔知整嚟做咩，條路又多老人家行，好易就戟倒！」
引路徑損壞後變成斷截禾蟲，未能發揮功能之餘更易絆倒行人。
領匯發言人承認，上址的觸感引路徑早前曾進行維修，及後又再有損壞情況，因此將會使用其他物料鞏固引路徑，商場辦事處會盡快完成有關維修工程。
「嗰條通道係彩雲二邨居民嘅主要通道，平台又有好多長者喺度坐，成日都咁爛法好危險！」彩雲邨區議員譚美普直斥領匯用料不當，令引路徑「屢修屢爛」，要求領匯檢討物料的選用，確保居民安全。
