反政府獲高分 通識題太反智

考評局公布今年中學文憑試通識教育科嘅考試報告撮要，公開被評為第一級「肥佬」至第五級佳績嘅考生作答示例，其中一條題目要求考生引用資料列出兩幅照片所顯示嘅訴求，指出港府管治嘅兩項困難。本來呢，港府管治一向弱雞，要求考生直斥其弊並無不妥，問題係，官方考卷照片居然出現一張「不要騙子政府」嘅橫額，大家話奇唔奇怪吖？咁都未算喎，有份答卷作答示例被指偏頗，大部分內容都係引用不支持港府嘅例子，明顯未達致正反兩面平均分析嘅要求，但係居然被評為第五級佳績，簡直令人搲爆頭。

即係咁，反政府唔止成為政客撈取選票嘅靈丹妙藥，仲變成學生獲取高分嘅標準答案，咁搞法，容乜易搞到學生個個「長毛」上身o架？教育局以高分鼓勵年輕學子反政府搞抗爭，你話唔係反智都唔得喇，日子有功，潛移默化，同政治洗腦冇乜分別嘅咋。反政府成為學科重點、校園主流，港府點會唔管治困難，香港點會唔七國咁亂吖。難怪有教育團體批評，通識卷示例展示反政府立場，情況令人不安。

其實，就算撇開政治取態唔講，呢份作答示例都好有問題喇。通識教育講求理性分析，獨立思考，但上述答卷偏埋一邊，明顯違反客觀持平嘅原則。再講，一旦答卷變成政治申述書，評分隨時黨同伐異，對考生好唔公平啫。

不過話時話，反政府答卷受到當局推崇，一啲都唔奇怪o架。一來港府充斥無間道，話唔定有人想喺學界撒下反中亂港嘅種子；二來咯喎，家陣嘅香港是非不分，呢份反常示例絕對迎合潮流。呢，早前有疑似幼稚園老師向幼童灌輸警察係壞人嘅觀念，亦有幼稚園藉繪畫向學生灌輸支持佔領嘅思想，連牙牙學語嘅幼童都被洗腦，何況係中學生吖。

所以話啫，香港法治蕩然，是非觀念扭曲，搞事政客固然難辭其咎，而港府一樣責無旁貸。佔領行動無法無天，當局束手無策不特止，仲反過來保護違法者，簡直係荒謬中嘅最大荒謬。計太一叮話齋，如果學生下次再被要求指出港府管治兩項困難，不妨考慮呢個答案：社會黑白顛倒、教育官僚反智，叮。