香港佔領街道行動逾月，廢柴政府束手無策，遍地開花之際，竟有劣質建制派議員嘷叫，話今時今日香港管治失控，全屬源於「通識教育」累事，即時，帶領香港廢柴政府最高層和議話青年教育不足，乘機建議重推「愛國教育」課程，真係恐怖！

這個鼓勵學子多角度思考，發揮獨立批判能力的通識教育，乃係前教育統籌委員會主席以財技專家本色，套用營商概念，打造成本效益，將「老師」轉職為「課室從業員」，「學生」係「老細」「僱主」，而「學校」只是知識轉售的大中小「企業」！新課程之「通識教育」便是牟利大生意的一個新項目，帶動商機無限，帶挈人人有錢搵！

當日提出教育課程改革，切除了歷史科，改新加設「通識教育」，再經一眾教育部門高級官員「商議」拍板，通識課便成為全港學生繼中英數後的唯一「必修科」矣！

通識教育行咗幾年，還未有具體成效研究報告，就有低質的土共來打沉它？乜「通識教育」真咁鬼有料到？

香港的學生咁快就培訓到有獨立批判力？懂得多角度思考？睇得穿要為自己未來而發聲？若真係咁有效，咁推動者當然是「居功至偉」、「名垂千古」的香港偉人囉！出嚟選特首，一定有機會坐正也！

喂！未剷走「通識課」之前，請先打救吓那些本來教緊第二科而轉職教通識的老師呀！因佢哋嘅舊職位已由其他同事代咗，若想翻啅也無門呀！另外，通識科的新老師剛畢業，便殺科，佢哋失業，邊個賠償畀佢哋先？

此外，將香港教育當兒戲，朝令夕改，點會教出好人才呢？玩乜呀？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps