城中鏡：Alice B.笨豬跳賀聖誕
名模Alice B.尋日出席活動時透露，聖誕將會同友人到澳門塔跳笨豬跳，雖然已經係第三次喺澳門跳笨豬跳，但係仍然感到非常緊張，佢話：「我會25號跳，所以當係送畀自己嘅聖誕禮物，今次我會跑上塔頂先跳，增加刺激感。亦都可能同朋友一齊跳，因為佢哋驚，但係我會游說佢地話好好玩，但就冇同媽咪講，因為講咗佢會擔心，又叫我要小心啲！」
Alice B.（左）透露聖誕會到澳門塔玩笨豬跳。朱璇就話聖誕要喺工作中度過。
問到患病嘅媽咪身體如何？佢話媽咪依家喺英國治病，爸爸陪伴在側，但係爸爸指媽媽健康狀況差咗，現在只有盡量令媽媽每日過得開心啲。佢又自爆依家仲係單身，因舊年嘅感情生活太精彩！
朱璇考慮重返校園
同場仲見到以低胸裝現身嘅女星朱璇，佢透露聖誕會去橫店拍戲，已準備咗羽絨禦寒。
對於曾有女星在橫店遭鹹豬手，問佢可會擔心？佢話：「唔擔心，我會盡量同劇組嘅人一齊，唔會單獨行事。」問佢約滿會唔會續約時，佢話仲諗緊繼唔繼續讀書，因為嗰陣大學仲有一年畢業就去咗選美。
