城中鏡：碧咸現身杭州 拍馬雲撐淘寶
為咗光棍節，大家可以去到幾盡？就連萬人迷球星碧咸（David Beckham）都打「雙十一」主意，尋日現身杭州，據聞會喺呢個大節，推廣佢隻威士忌品牌。
碧咸尋日現身杭州阿里巴巴園區淘寶城，喺馬雲嘅陪同下參觀總部。（互聯網圖片）
碧咸尋日現身杭州阿里巴巴園區淘寶城，喺馬雲嘅陪同下參觀總部。一班「巴打絲打」見到碧咸，即刻大叫，鬼咩，碧咸一身紳士打扮，靚仔到爆燈，張靚相貼咗喺社交媒體，個版洗完再洗。老友話，碧咸來淘寶城係為咗「雙十一」活動造勢，行內人就認為，呢次係雙贏嘅合作就真。
自從馬雲入股恒大足球隊後，當然很清楚足球帶來嘅巨大關注度，於是喺即將開始嘅淘寶「雙十一」活動中，亮出碧咸呢張王牌。至於碧咸，作為合夥人推出嘅威士忌品牌，將喺天貓進行全球首次發售，碧咸也將作為淘寶「雙十一」期間嘅「明星拍檔」，為全世界粉絲發紅包。
陳懷德自信五年內贏馬雲
據講，碧咸嚟淘寶係阿里方面主動要求，站喺碧咸立場，也樂意同馬雲共同亮相吸引全世界眼球嘅，逐步開拓喺中國嘅龐大市場。
另外，啱啱改咗名做中國富佑嘅中國包裝，新主席陳懷德話睇中手機網絡銷售呢項業務，仲自爆同馬雲及騰訊創辦人馬化騰兩位科技奇葩特別有緣，而且好熟，到依家人哋飛黃騰達都仲有聯絡。佢向馬雲下戰書，夢想係未來五年內打敗馬雲咁話。咁有大志，原來係易經大師贈咗佢呢幾句。咁會唔會叫啲Friends入股？陳總就話「乜都可以想像。」好玄呀。
