城中鏡：潮州商會破傳統 選出女副會長
香港潮州商會日前舉行新一屆會董就職禮，從事製衣企業嘅Winnie高佩璇創先例當選會內多年來第一名女副會長。Winnie話商會能夠與時並進，一班董事局成員亦好開明，明白男女各有所長，所以董事局選舉都無分男女。
張成雄（右三）接任潮州商會會長一職，獲太太（左三）、兒子張俊勇同太太陳慧苓（左一及二）、張俊挺同太太溫穎斌（右二及一）出席打氣。
潮州商會首位女副會長高佩璇（左）同會董劉文文都係會內少數女性成員之一。
潮州商會副會長馬鴻銘（左）就職，太太蔡加敏形影不離（右）。
其實由上屆開始，前會長周振基已經喺商會內成立婦女委員會，可見商會對女成員同樣重視。不過，Winnie補充話，雖然佢哋備受重視，但仍不忘秉承潮州女性優良傳統，做一個入得廚房出得廳堂嘅溫柔女子，在家相夫教子，喺商會就輔助其他成員。仲記得Winnie閒時潛心佛學，曾兩次倡贊佛舍利及佛頂骨舍利赴港祈福。
惜食文化 典禮晚宴分開搞
除咗男女平等，商會亦響應惜食文化。新任會長張成雄有見過往宴會廚餘太多，日前特別建議將就職典禮同晚宴分開場地進行，等會董們唔使為咗出席儀式，同時綑綁式報名參加晚宴。當晚所見，有報名參加晚宴嘅人，真係有乖乖坐低食飯，雖然只有四道菜式，但精簡大方，不失禮之餘又夠環保，幾乎每枱都食到乾乾淨淨。
出席就職禮嘅嘉賓眾多，包括勞工及福利局局長張建宗等官員，仲有香港科技大學校長陳繁昌等。張建宗致辭時賣口乖大讚張成雄係「三良老闆」，有良心、有「糧」出、又善良，仲話當年張結束經營三十年的酒樓時，竟有員工掉轉頭花錢買咗塊金牌畀老闆，令佢印象深刻喎。
