政壇：搞搞政：社民連「讓賢」學民 謀拉黎汶洛入黨
社民連同學民思潮經常眉來眼去，就係政圈內人所皆知，好似「長毛」梁國雄係第一人話要五區總辭，學民仔就話支持五區總辭，後來有人話五名泛民議員一齊辭職太高風險，長毛改口話只要超級區議員辭職都好，結果學民仔亦繼續硬撐。最近長毛話就算無泛民議員肯辭職，佢單拖都願意搞新界東一區變相公投，點知學民仔亦無話反對，認真聽教聽話。
設計圖片及對白
如果長毛辭職後，應由兩位副主席黃浩銘或吳文遠替補出選，絕對有利第二梯隊接棒。近日有心水清嘅社民連中人就諗到條好橋，喺長毛辭職後，由學生代表參加補選。如果由學生出戰會令選舉更「純潔」，選民投票時都唔需要糾纏在「投人定投議題」困惑之上，加上餘下任期得番不足兩年，選贏亦唔使太擔心。
如果真係成事，睇怕唔少學生都對社民連「讓賢」呢幕刻骨銘心，到一六年立法會選舉，隨時選番社民連嘅候選人。
欲吸學生選票
有政界中人分析，今次佔領行動令二十二歲以下嘅年輕選民急增，如果社民連能順利吸納學生票源，絕對有利延續社民連壽命，又可以擺脫只靠長毛一人嘅命運。社民連亦一早有意從學民思潮嘅骨幹成員入面揀蟀，聽聞學民發言人之一嘅黎汶洛就同社記中人經常合作，將來好有機會加入社民連，過多一、兩年後，黎汶洛亦夠年齡出選立法會，隨時係社民連秘密武器。
