公務員系統極講階級，愈高級嘅公務員擁有愈多權力同福利，連問責官員都要融入呢個文化。好似各個決策局嘅政治助理咁，幾年前薪酬明明屬於首長級數，每個月最少月入十幾萬元，但自從今屆政府上場後大削人工至十萬元或以下，唔止人工被減，連政府車位都無資格申請，搞到班政助要周圍問上司借車位至得。

設計圖片及對白

佔中累AM車以外禁入

做得政治助理，人工都有番咁上下，養車絕無難度，但因為人工未達十萬元呢個「門檻」，政府體系內就無資格申請政府車位。據聞現屆政府最少有四位政治助理係有車一族，民政事務局政助徐英偉就係其一。咁點算好呢？好彩上有政策、下有對策，唔少政助已向其他月入十萬元以上嘅無車同事埋手，包括副局長在內，問佢哋借車位。

因為合資格嘅高級公務員可將車位抽籤機會推薦畀其他人，經審批後就可轉讓，唔少政助都係靠呢招先有車位用。不過，好景不常，班政助近日有車位都無用，因為行政署決定應對佔領行動情況，禁止所有AM車（政府專用車）以外嘅車輛駛入政府總部停車場，即係話個個政助都要一律搭車返工放工。

其實政助連個人秘書都不獲分配，所有文書都要自己一腳踢搞掂。不過，做得政治助理就係做阿四，有無車位都係芝麻小事，行多兩步路既健康又環保，況且一眾政助知名度低，就算行路返政總，佔領人士都唔認得佢哋啦！

第一手消息請下載on.cc東網iPhone/iPad/Android/Windows Phone Apps