香港乜都唔缺,最缺就係土地,否則港府都唔使為咗增加土地供應絞盡腦汁,大嘆「地從何來」喇。不過世事無絕對嘅,好似食環署咁吖,轄下街市空置率長期高企,寧願丟空養蚊,都唔諗吓點樣善用土地資源,簡直敗家。

冇冤枉o架,有團體近日巡查食環署八個街市及熟食市場,結果發現門堪羅雀,尤其係荃灣荃景圍街市空置率高達八成八,幾乎十室九空。葵涌大圓街市亦不遑多讓,空置率高達八成半,全場僅得三間熟食店營業,成個下晝鬼影冇隻。位於港島旺區嘅銅鑼灣燈籠洲街市及筲箕灣街市亦唔好得幾多,空置率達到六成四及五成七,問你服未。

講真,食環署街市長期拍烏蠅,早就唔係乜嘢新聞嘞。審計署早於○三年已揭發問題,點不知食環署意見接受,態度照舊,結果審計署○八年再次開腔炮轟。正常人嚟講,畀人鬧咗咁多次,點都會知衰啩,可惜吖,食環署官僚面皮十尺厚,教而不善不特止,仲衰到弄虛作假,粉飾太平。呢,食環署今年初聲稱公眾街市空置率改善,整體出租率達到九成喎,點知話口未完,有政黨踢爆,當中並唔包括將會進行整合或改善工程而要凍結出租嘅空置攤檔,即係話,九成出租率純粹吹水嘅咋。

即係咁,街市空置原因眾多,可能係位置不佳,設施不足,人流不旺等等,之但係,有問題咪想方設法解決囉,正所謂只要精神不滑坡,辦法總比困難多。正如有人話齋,食環署可以引入民營管理公司改善出租率,又或者改建診所、骨灰龕場、商場等等,總好過乜都唔做,生人霸死地吖。

唔係講笑o架,呢啲空置街市嘅年度虧蝕愈來愈嚴重,由過去每年蝕逾億元,擴大至去年嘅二億二千萬元。今年《施政報告》係就係有提及研究改善街市定位,可惜到家陣都係得個噏字咋。太一叮諗極唔明,既然本港房屋問題嚴重,港府為咗搵地起樓出盡法寶,甚至被人鬧「盲搶地」,點解唔索性收回街市,興建公屋或賣畀發展商呢?地盡其用,咁咪皆大歡喜囉。

所以話,港產官僚食古不化,腦袋構造異於常人,真係冇人明白佢哋諗乜o架。不過講到尾,珍貴土地資源被白白浪費,都係拜前任食衞局廢官周一嶽所賜,唔係佢多年來無所作為,呢個燙手山芋又點會留到家陣都未解決吖,叮!

第一手消息請下載on.cc東網iPhone/iPad/Android/Windows Phone Apps