城中鏡：鄭慕智開金口 掌聲善款不絕
前身係舊病理檢驗所嘅香港醫學博物館，日前在黃竹坑醫學專科學院舉辦籌款晚宴，為坐落於百年歷史建築的博物館籌募日常開支經費。多位城中名人出席表演支持，其中被喻為唱得之人的教統會主席鄭慕智（Moses），今次都開腔為籌款晚宴獻唱名曲，一開口技驚四座，掌聲不絕，有嘉賓更捐出五萬元希望Moses安歌添！
鄭慕智一曲《O sole mio》技驚四座，掌聲不絕。
王振宇（左）同杜振源（右）非常老友，拍住上為醫學博物館籌款。
鄭慕智有一把靚聲，太太原來係幕後功臣。（資料圖片）
Moses當晚表演嘅係大家耳熟能詳的意大利歌曲《O sole mio》（我的太陽），唱開高音嘅Moses聲線雄渾厚亮，佢透露表演之前並冇刻意練習，而佢之所以咁好氣，除咗唱開歌外，仲可能係因為近期多咗游水，加上有太太靚湯滋潤，把聲自然靚晒，難怪好多台下嘉賓朋友一聽到即馬上起哄鼓掌。
王振宇捐靚酒支持
其實，Moses有靚聲之外，歌藝都不凡，近年每逢聖誕，佢都參加報佳音嘅活動，唱唱吓，不但成為唱得之人，仲成為慈善表演活動嘅台柱，真係有心又有好功夫。
當晚嘅活動中，仲見籌款晚宴籌委會主席王振宇（Benjamin），同「快勞夾大王」杜振源（Simon）。Simon除咗係小母牛香港籌款委員會主席外，更係香港醫學博物館學會副贊助人，佢捐咗十二支一九八二年嘅靚酒作慈善拍賣，相當支持。而Benjamin就希望，籌得資金可以助博物館繼續發展教育用途，讓更多人了解本港多年醫療發展。
