世界變!世界乜都變了!而且,變得多、變得快。其快之速度,令人難以跟隨;其多之產量,亦叫人難以接受!遠的不說,乾看香港近年的維園年宵情況,已讓人看透世界急遽異變之恐怖!

早前年宵市場,本以賣應景年花為主,伴之就係過節糖果食品,及一些兒童玩意;後來,香港經濟發達,年宵攤位多了點「唔等使」的副產品,例如家居小擺設或紀念品;再來,就更多元化,有嘢食、有嘢玩,愈來愈嘉年華化,行年宵市場,不一定來買嘢的,反而趁熱鬧的多!

現今,則變化更大,有學生合組團隊「創業」,甚至,有中學贊助老師帶隊聯同學生投一攤檔「做生意」,好等佢哋早日接觸社會喎!但又反對學生參與「佔領行動」!除學生仔之外,亦有年輕人愛「自創」「發明」「設計」啲新產品落場玩,愛聽掌聲多過賺錢;同樣,各大小政團政黨也投番一檔,用以「接近群眾」,爭取選票。

過往,一千幾百便可投得一小攤位玩幾日,家陣,動輒十萬八萬,尤以熟食大檔,用五十多萬換幾天做生意時間,條數點計?原來,啲大集團旨在做形象,趁年宵人多出入,傳媒廣泛報道下,介紹新產品,搞推廣宣傳,所以,那些投標,博做幾日生意發新年財的小商販,只能靠邊站吧!而這些所謂大集團,又多不是本地港人了!他們係大陸企業嚟o架!

講大陸貨,即使年花大桔,也愈來愈少本地花農開檔了!一來做農民搵唔到食,二來,大陸來貨又平又大件,香港無得揪也!

香港維園花市變化最大,係以前政府最高層一定親臨現場,與眾同樂及打成一片的,依家,只得番一半,就係剩下「打成一片」!唔敢蒲頭囉!

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps