學生陣營拋出促泛民主派議員辭職補選搞變相公投嘅建議,但泛民兩黨民主黨(白鴿黨)同公民黨(公文袋)都扭扭擰擰,推三推四,據聞泛民議員在飯盒會始終傾向唔支持辭職公投。社民連「長毛」梁國雄尋日忍唔住喇,話明如果無議員肯辭職嘅話,佢會考慮自己辭職發動「一區公投」,長毛呢一招旨在將兩黨一軍,希望製造辭職公投,只不過,做公職搞到好似玩遊戲咁,市民真係冇眼睇噃。

設計圖片及對白

泛民傾向唔支持

早前承諾唔會搶閘辭職嘅長毛尋日盡最後努力,佢話可考慮由泛民三名超級區議員辭職,其後又再話如果都係無議員肯辭職,會考慮自己一人辭職,發動一區公投。曾表明願意辭去超級區議員嘅白鴿黨「AV仁」何俊仁接受查詢時就話,憂慮辭職公投會否投票率低、出現公投議題複雜等問題。據聞,泛民飯盒會經過連日討論後,已傾向唔支持辭職公投,所以剩低嘅問題,就係長毛會否兌現承諾發動一區公投,但仍要通過社民連內部一關。如果成事,好大機會由社民連副主席黃浩銘接棒參選。

如最後只得新界東一區選民投票,結果有幾大代表性呢?明顯冇囉,而且黃浩銘參選亦未必穩勝,西貢區議員方國珊被視為可能參加補選嘅一員,其他挑戰者都不能排除,到時長毛會唔會恨錯難返呢﹖講開方國珊,佢早前被指涉嫌觸犯「藐視立法會」罪,今日於東區裁判法院提堂。

第一手消息請下載on.cc東網iPhone/iPad/Android/Windows Phone Apps