貴為國家級基建工程嘅港珠澳大橋香港段,雖然被本報連環踢爆滯工兼超支,但運輸及房屋局一直堅持大橋可以趕及一六年通車。不過,發展局尋日書面回覆立法會議員提問時,懷疑「鬼拍後尾枕」,列明大橋嘅香港口岸要一七年底才完工,即係延誤一年!我哋梗係即刻追問運房局啦,但答案竟然係話發展局「寫錯咗」,但當有電視台報道大橋延誤消息後,運房局同發展局都唔澄清,莫非兩個局喺度「扯貓尾」?

發展局書面回覆列明港珠澳大橋香港口岸一七年底才完工,但運房局一時話寫錯,一時又唔肯定。

立法會議員胡志偉之前向政府提問,要求相關部門交代各項大型基建項目嘅工程費、完工日期及需要人手數目,因為近幾年政府又起屋又鋪路,已經搞到建造業人手短缺,工程費係咁升。負責回覆嘅發展局就以表列嘅形式、順住完工年份咁列出唔同嘅項目,結果應該在一六年完工嘅港珠澳大橋香港口岸,竟然仲起得慢過高鐵,要到一七年底先至完工,同運房局之前嘅講法明顯有出入。

有關工程關乎到國家面子,茲事體大,究竟「2017年底」呢個年份真係寫錯,定發展局唔小心講咗真相,兩個政策局真係有需要解釋一下。

第一手消息請下載on.cc東網iPhone/iPad/Android/Windows Phone Apps