政壇：方剛暫做黨魁力捧鍾國斌接棒

自從田北俊（田少）被北京全國政協委員會高票通過褫奪其政協委員資格後，連自由黨黨魁一職都辭埋。聽聞經過黨內醞釀，再經田少一錘定音後，已經決定黨魁之位由黨內另一元老、批發及零售界議員方剛暫代。聽聞掛住湊孫嘅方剛都唔係太願意接手，只係捱義氣頂住先。

田少早前講過話黨魁應交由「中生代」接棒，但點知尋日反而話經過多番討論後，認為黨魁應由保守派人士接任，所以認為方剛係合適人選。本來唔肯接手嘅方剛都轉口風，話做唔做黨魁係由黨員決定，唔係佢話事，仲話預咗將來無時間湊孫，睇嚟佢都疊埋心水做黨魁一職。

不過，據該黨中人話，方剛年紀都有番咁上下，相信做完呢兩年後都要交棒，以免成為老人政黨，接任人選仍然首選紡織及製衣界議員鍾國斌。現時方剛做黨魁之餘，亦兼任「太傅」一職，力捧鍾國斌兩年後接手。