政壇：龐寶林代表中大EMBA打網球
城中有單體育盛事，幾個團體合辦2014年香港國際EMBA網球賽，參賽隊伍除本地薑外，仲請了中山大學、復旦大學、中歐商學院及廈門大學四間「過江龍」參與比賽。好波嘅東驥基金管理董事總經理龐寶林將代表中文大學EMBA隊參賽。
龐寶林係網球發燒友，將會代表中大嘅EMBA隊參賽。（資料圖片）
呢個網球賽係由香港元老網球總會主辦，香港「電梯大王」胡法光之子、身兼菱電發展主席及城大校董會主席胡曉明，就係呢個會嘅會長，胡亦係龐寶林喺聖保羅男女中學嘅師兄，所以兩人好老友！龐寶林話，胡曉明嘅球技好勁，犀利過佢好多，兩人有時仲會打番場友誼波切磋。
講到今次比賽，龐寶林充滿信心，話隊中新添兩名女隊員，佢以「球藝不凡」嚟形容兩位女士。佢仲話，上個月佢哋成隊人去咗上海，參加內地另一個全國名校EMBA網球大賽，結果攞咗一個團體組別嘅冠軍，事後大家齊齊去上海崇明島食大閘蟹、海鮮慶祝，實行「擦」番餐勁當獎勵！
