走埋一齊幾個月嘅立法會「六散人」近來積極行動,先係尋日約埋去見政務司司長林鄭月娥,下星期又會同特首梁振英及財政司司長曾俊華會面,就明年發表嘅施政報告及財政預算案發表意見。雖然佢哋係以「六散人」呢個名義約見政府官員,但原來大家都覺得「六散人」呢個名麻麻哋,諗住盡快改番個新名喎。

吳亮星覺得「六散人」個名「散散哋」,建議要改番個好啲嘅名。

金融界議員吳亮星(星爺)話,雖然上屆由功能界別議員組成嘅聯盟都係稱呼自己做「散人」,但佢覺得「六散人」個名畀人感覺「散散哋」,似乎唔多好聽,於是就建議其他盟友齊齊幫手諗番個新名。佢話六個人有君子氣量,可以考慮叫聯盟做「六君子」喎。

星爺諗咗幾秒,就醒起清朝末年推行百日維新後,慈禧太后下令捕殺一眾主張變法嘅人士,包括時稱「戊戌六君子」嘅譚嗣同、林旭等人。星爺於是覺得「六君子」個名唔多吉利,話要搞番個徵名比賽,邀請各界齊齊度橋。召集人廖長江都認為改名一事事關重大,話要盡快同大家商量下喎。

第一手消息請下載on.cc東網iPhone/iPad/Android/Windows Phone Apps