政壇：發叔擬交棒畀女婿?
政壇代有新人出，鄉議局主席兼立法會議員劉皇發（發叔）已年屆七十八歲，外間都關注呢個新界王幾時退下火線。發叔尋日講到立法會鄉議局功能界別議席時，明示暗示想退，仲講到明想交棒畀後生仔，即係邊個呢﹖佢透露女婿、信和置業董事總經理余漢坤有興趣喎。唔通發叔做定鋪排，準備將立法會嘅議席交棒畀個半邊仔？
不過，佢都冇打算全面言退，事關明年一月舉行嘅村代表選舉，下周五開始接受提名，發叔本身係龍鼓灘村村代表，佢尋日都擺明車馬，話會繼續參加村代表選舉，繼而選埋鄉事委員會同鄉議局主席。
余漢坤有興趣從政
發叔解釋，成日坐喺立法會開會好辛苦，所以係咪連任要再諗吓先，仲話可以畀啲後生仔做吓。大家於是問佢咪想畀兒子劉業強接棒呢？發叔就話，劉業強無興趣呢方面嘅工作。咁係咪女婿余漢坤呀？發叔就打晒開口牌話女婿係有興趣做。其實鄉事派內部早已傳出發叔想交棒女婿，而余亦一直有迹象為從政鋪路，除咗有傳佢想由離島委任區議員轉戰直選外，早前仲加入埋大嶼山發展諮詢委員會添。
繼續坐鎮避免生亂
咁點解仲要選村代表呢﹖發叔話，佢一九五九年開始就做龍鼓灘村村代表，做開有感情，加上村內一有糾紛，村民都會搵佢做和事老，啲村民唔想有人為咗爭做村代表而搞到條村立立亂，所以就想佢繼續坐鎮喎。發叔又話，得閒打吓麻將，間唔中去下行山，人都會精神啲喎。
