大學生淪為炮灰 淫賤黎其心可誅

佔領行動拉鋸接近四十日，早就變成強弩之末，學生組織要求反對派立法會議員辭職引發「公投」，點知政客各懷鬼胎，反應冷淡，幕後黑手無計可施，居然煽動學生趁北京舉行亞太峰會期間北上抗爭，話要直接同國家領導人對話喎。嗱，呢啲咪叫奸人出口，笨人出手囉，幕後黑手慫恿學生北上抗爭，自己就等睇戲，簡直係誤人子弟，毀人前途。難為班學生仲自鳴得意，以為自己真係民主鬥士，其實做咗人哋嘅政治工具都唔知，既可憐，又可悲。

係人都知，學生提出嘅訴求完全不切實際，唔止幼稚，而且狂妄，根本冇可能實現。唔好話佢哋未必可以成功闖關，就算上到北京又點吖？佢哋想見邊個就見邊個吖？正如有人話齋，佢哋喺香港就話可以無法無天啫，去到北京就唔到佢哋發惡嘅喇，萬一唔好彩，隨時有去冇回都似。最離譜嘅係，淫賤黎仲公然煽風點火，慌死人唔知佢就係罪魁禍首。佢話喎，學生上京冇風險，最多只係被拒入境或被捕，「被拉仲好，到時會有五十萬人走出嚟」。

所以話，妖孽就係妖孽，淫賤黎為搞亂香港，延續佔領鬧劇，居然叫學生自投羅網，咁冇人性嘅說話只有佢至講得出，唔怪得有人話佢陰毒喇。正所謂，當仁不讓，既然淫賤黎講到自己咁偉大，點解唔主動帶隊上京呢？如果學生被拉會有五十萬人走出嚟，咁淫賤黎被拉豈不是隨時有過百萬人上街慶祝？到時佢咪可以求仁得仁，做民主烈士囉。

淫賤黎鬼拍後尾枕，呢番冷血言論正好證明學生係佔中黑手及外部勢力嘅政治炮灰。受人錢財，替人消災，有人收咗洋人嘅狗餅，梗係要做番齣好戲，而自己又唔肯犧牲咯喎，咪叫學生去送死囉。

講開又講，佔中鬧劇陷入僵局，對經濟、民生、法治造成難以挽回嘅傷害，淫賤黎等幕後黑手固然其心可誅，不過港府同樣難辭其咎嘅咋。佔領者公然違法，霸街阻路不特止，仲將法庭禁制令棄如敝屣，港府居然束手無策，想唔認無能都唔得喇。講到底，慶父不死，魯難未已，唔將禍亂香港嘅淫賤黎等佔中黑手繩之以法，香港就永無寧日，叮！