SUN搞作：打橫嚟講：風高物燥 小心防火

首先，拿民望最高的食衞局局長高永文打頭陣，喺個多星期前，已「預告」全球無得醫的伊波拉病毒有機會傳入廣州。無啦啦，更在此時此刻又唔知邊位有心人請來那位伊波拉病學首席專家來港出席演說，借助外國勢力，增強伊波拉病毒「入侵亞洲」的風險訊息，好鬼嚇人。

跟住，仲騎呢的，又係高局長撲出來開記招，話喺金鐘佔領區的一個學生不適入廠，搞了兩日，仍未「發現病源」！吓！又話香港醫療體系是世界頂級的，何解，一件感冒發燒的簡單Case，形容到世紀大絕症咁得人驚！真定假呀？

再嚟，高局長又再三出現鏡頭前說家陣白紋伊蚊猖獗，可短時間內狂叮數人，傳染死得人的登革熱病，天口冷，就是高峰期……

嗱！大家各位都係唔好周街走，通街瞓，躋身人多污糟逼狹的地方嘞！最好就係「早啲返屋企」啦！潛台詞是這樣說的！

我兩三星期前，已跟行家朋友講過，香港廢柴政府要柔性清場的話，一定用「傳染病」呢招，果然批中了！

早幾日，各佔領區平靜安寧得有點怪異，近兩日，見政府又重新發動輿論攻勢，不但各大傳媒幫腔，連大學民調也跟政府同一口徑，指「民意逆轉」，促佔領者退場同時，各佔領區又見有暴民晚晚借故尋釁滋事了！但往往被守護者「勸走」，不能得逞。

但當呢啲清場B隊「辦事不力」之際，我反而擔心，在現今天氣風高物燥之下，真係要小心火警，因有人為求目的，乜嘢喪心病狂、喪盡天良的暴行都敢做o架！早前，已試過有人放火o架啦！真係不想慘劇出現呀！請小心防火！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府