「甜大少，乜搞到『雙失』咁失策吖？」良老闆揶揄。甜大少一臉尷尬，「諗住講吓心底話，點知……」良老闆趾高氣揚，「世界上有大話、鬼話、普通話你唔講，學人講心底話？從政就要埋沒良心，你睇你啲黨友即刻同你割席，實撈到風生水起喇。」

甜大少表情緊繃，「你又唔好咁講，黨如其名，自由發言啫。」「哈哈哈！」良老闆大笑三聲，「呢度仲有自由，你就唔使『雙失』喇！學我咁，專心做個擦鞋仔，咪袋袋平安囉！」

「雖然我有交稅，但我都想為港發聲，做個真公民！以後我就可以暢所欲言。」甜大少死撐到底。良老闆反唇相譏，「你有水飲都係阿爺恩賜，你以後邊有生意，仲講交稅？你以後大把時間，喺開會嗰陣慢慢抽水就真。」

甜大少突然大笑，「怕咩，二少都仲話我愛國，我有二少做『對沖』，最多以後唔好講咁多嘢咪得囉！」

第一手消息請下載on.cc東網iPhone/iPad/Android/Windows Phone Apps