何倍倩要照顧三子女，但從未想過放棄事業。
恒生新抱Anina何倍倩向來事業心重，本身育有一子嘅佢，舊年再誕下雙胞胎。同一時間照顧三子女，但從未想過放棄事業，近月遂決定將屋企變成home office，除每天返公司開會外，騰更多時間喺屋企照顧仔女，能夠兼顧家庭同事業。
佢尋日開心透露其一手創立嘅瑞士護膚品牌Zensation，近日成功打入www.net-a-porter.com網站，同其他世界知名國際名牌並列。佢話：「可能之前喺美國出過好多電視節目，多人睇到，呢個網站好揀擇，唔係咁易入去，今個月中就會喺網發售。」另外，十二月又將會喺英國七間百貨公司上架，故來年佢計劃將公司擴充，實行大展拳腳。
不過，佢話無論如何，最緊要都係小朋友，實行向老公派定心丸。早前兒子五歲生日，佢同老公就帶兒子到沖繩旅遊慶生，帶兒子睇水族館、菠蘿田同行沙灘，佢覺得住喺香港嘅小朋友，見慣城市嘅高樓大廈，所以一有機會就讓兒子多點親近大自然，佢話：「阿仔喺水族館睇咗個半鐘頭魚唔願走，其實我睇咗半個鐘已經開始悶，點知想帶佢走時，佢竟然喊起上嚟，之前唔畀佢玩機動遊戲都無喊，佢真係好鍾意動物。」
第一手消息請下載on.cc東網
