因為不滿大學生參與佔領行動,早前有本地建築公司斷然決定終止贊助於多所大專院校設立嘅獎學金,引起社會一番爭論。雖然香港城市大學並未受影響,但似乎都擔心有機構或贊助人會縮沙唔贊助。

郭位三兩下手勢就於校慶晚宴上搵到贊助人。

楊素珊(右二)同一班城大校友一齊出席三十周年校慶晚宴。

葉少康(左)同陳鳳翔(右)一齊趕赴晚宴。

日前城大舉辦三十周年校慶晚宴,校長郭位即場搵到幾個贊助人之後,就立即上台將收到嘅贊助人卡片騷畀大家睇,笑笑口話講完冇得唔算數喎,認真新招。

當晚三十周年晚宴,請到一眾城中名人齊齊慶祝,當中唔少仲曾經係校友添!咁多有潛質同有心為教育出一分力嘅人喺身邊,校長郭位當然好識把握機會,喺致辭完畢及與嘉賓敬酒後,話咁快就已物色到幾位有意為城大提供獎學金等資助嘅好友,仲立即上台多謝佢哋對教育嘅支持,確保啲贊助實食冇黐牙。

俊和撤捐款同引中資無關

出席捧場嘅嘉賓好多,好似審計署署長孫德基、金銀業貿易場理事長張德熙、中華廠商聯合會副會長陳淑玲、前輩級歌手張德蘭同夫婿楊偉誠等。

其中香港專業及資深行政人員協會理事Susan楊素珊約埋幾個朋友一齊嚟,見佢哋咁啱傾,原來因為佢哋曾經一齊喺城大修讀過高級管理人員工商管理碩士,畢業後間中都會約埋一齊聯誼。

臨開場前,仲見到北京殘奧馬術比賽香港選手葉少康,孖住舊同學兼城大商學院客席教授陳鳳翔一齊趕至同其他校友歡聚。

講開停止向多間大學捐款嘅俊和發展集團,主席彭一庭尋日出席股東周年大會時話,撤大學捐款與引入中資合作無關,只係好關注佔領行動令大環境變壞,連累細規模公司都冇好日子過,若工程屢受阻,香港難再有活力。

第一手消息請下載on.cc東網iPhone/iPad/Android/Windows Phone Apps