政壇：搞搞政：佔領行動累鬥累 泛民建制大輸家
歷時超過一個月嘅佔領行動進入膠着狀態，泛民費盡周章諗退場機制，建制派亦花盡心思反對佔領行動。最新一輪香港大學喺十月十三至二十三日分兩階段進行嘅調查，分別訪問咗過千名市民，調查各黨嘅支持度，結果令人大吃一驚，十大入圍政團中，九個政團得分都錄得下跌。
設計圖片及對白
學聯逆市上升
跌幅最大係公文袋、白鴿黨，分別跌九點四分同八點八分，某程度上證明咗部分市民開始離棄呢兩大泛民黨派；其次係工黨，跌咗八點七分；而社民連同人民力量亦分別下跌七點九分及六點九分。建制派亦唔好得去邊，其中以新民黨跌幅最大，下跌八點三分；工聯會同富貴黨都分別跌咗八點二分及七點九分；建制派「重磅股」如建仔亦插水，跌幅為六點二分。
由於大家齊齊失分，所以排名變動不大。不過，唯一逆市反升嘅政團就係學聯。學聯過往由於認知率唔高，甚少打入港大民調嘅十大政團，點知今次彈出，平均得分有四十七點七分，位列眾政團之首。不過，由於學聯未有記錄上次得分，所以睇唔到支持度升定跌。學民思潮嘅平均得分都錄得下跌，但因跌幅只有四點一分，進佔十大政團第五位。
從今次調查結果可以睇到，泛民同建制都係呢場佔領行動嘅大輸家，就算學聯成功突圍而出，亦唔代表泛民黨派可以受惠，所以泛民再唔檢討本身嘅定位，睇怕未來兩年選舉真係凍過水。
