政壇：黃冠球打拳有功 投資策略似踢館
上海商業銀行財資業務處總監兼候補行政總裁Paul黃冠球，原來下個禮拜就退休，真係畀佢嚇咗一跳，咁後生退休？佢自爆已六十三歲，唔知係咪打拳有功，keep得咁fit。
黃冠球後生時學打拳，最難忘係跟師父去踢館。（資料圖片）
大大隻嘅阿Paul後生時喺拳館學打拳，仲跟埋師父去踢館添！講起呢段「光輝歲月」，佢話最難忘嘅要數有一次跟師父去踢館，打到後尾佢睇下周圍形勢，已經知道自己一方贏唔到啦，於是就果斷放棄進攻，轉為防守。
阿Paul笑稱，好彩自己識得轉變戰略，如果唔係都唔知最尾有冇力行得番出去。今年六十三歲嘅阿Paul，喺上商服務咗成四十年，望上去仲好精神，睇嚟都係長期打拳做運動之功。
不過，打拳嘅經歷係咪對佢日後從事財資工作都有影響，令佢嘅投資策略偏向保守呢？阿Paul笑笑吓又不否認，只稱「都有可能」。
