政壇：吳得掂周圍外訪 楊潤雄焗留港署理
日前同大家講過，教育局局長「吳得掂」吳克儉同常秘謝凌潔貞嘅不和傳聞似有升級迹象，最主流嘅講法係謝凌潔貞不滿吳得掂周圍外訪，留低佢一人孤軍作戰，點知話咁快就應驗咗。
楊潤雄冇得去廣州，要留港署任教育局局長一職。（資料圖片）
話說吳得掂正外訪德國同瑞士了解職業教育制度，而政府就宣布周四出發到廣州嘅粵港合作聯席會議嘅官員，包括教育局副局長楊潤雄。點知政府罕有地喺短短兩個半小時內，急急出稿更正，話出發到廣州嘅代表團名單有更新，但其實只係一個調動，就係由教育局副秘盧世雄赴會，楊潤雄則留港署理教育局局長一職。
唔通謝凌潔貞不滿兩位局長走晒去，所以提出抗議？其實今次都幾奇怪，如果真係正、副局長都離港，咁邊個署理局長職務呢？
