政壇：上市委員會加薪主席年袋15萬
港交所上市委員會成員肩負「守龍門」把關新股上市重任，但每年只得八萬蚊「車馬費」，真係「收入同職位不相稱」！尋日港交所終於公布，會加佢哋人工，其中上市委員會主席每年加到十五萬元，加幅高達百分之八十七點五；副主席就加百分之五十六點二五，到十二萬五千元；委員亦有得加，每年十萬元。委員會主席李嘉士都可以年袋十五萬元嘞！
驟眼睇加幅好似幾驚人，但委員會由○七年到一四年，足足七年冇加過「車馬費」，而且佢哋每年開會無數，開會前仲有成呎厚嘅文件要睇，工作量其實好大。
至於主席同副主席人工加幅特別大，係因為佢哋要主持好多會議，亦預期出席率會較其他委員為高。
過往上市提名委員會，都會喺每年第一季至物色新一屆上市委員會成員人選，但係今年卻提早到十一月初就邀請各界人士申請做明年嘅上市委員，因為上市提名委員會擬在委任前先行同入圍候選人會面，故需要提早展開申請程序。
聽聞，上市提名委員會係希望申請同委任過程早啲開始先，可以有多啲時間畀提名委員會揀蟀，先至作出委任決定。
