政壇：郭偉強誤報學歷 賴助理高興得滯
立法會勞工界議員郭偉強○九年開始喺香港理工大學修讀社會政策及行政學士課程，上星期終於畢業，佢嘅助理都戥佢高興，仲急不及待幫佢喺立會更新學歷資料。不過，有自稱郭偉強同學嘅人就爆料，話郭誤報學歷，又話佢呢幾年都係「hea讀書」，仲要助理幫佢搵資料做功課。郭偉強解釋，相信係助理高興得滯一時寫錯，又話自己呢幾年讀書真係「有血有汗」，叫爆料人唔好亂咁講。
郭偉強在立法會網頁議員學歷一欄，寫咗「社會政策及公共行政學士」。（互聯網圖片）
爆料人質疑連讀乜都唔知
該名用化名嘅爆料人話，郭偉強喺立法會申報學歷為「社會政策及公共行政學士」，而理大係冇呢一科嘅，質疑郭連自己讀乜嘢都唔知。記者睇番立法會網頁資料，郭偉強議員資料嘅中文版的確寫多咗「公共」兩個字，但英文版就冇錯。郭偉強話，其實佢讀嘅都同政府運作、公共行政有關，可能助理聽得多，所以寫錯咗啫，但佢都承認自己應該小心覆核，唔會怪助理喎。
佢又話兼讀呢幾年深切體會到要兼顧工作同學業係好吃力嘅事。雖然工作忙碌，但寫論文、做功課、搵資料，甚至去圖書館借書都係自己一手一腳，冇搵過助理幫手，仲話如果爆料人講嘅係真嘅話，就唔怕用真名講喎。
