高中必修通識科自推出以來就備受爭議，最近教育局亦被指有意檢討通識科。鮮魚行學校校長、團結香港基金會成員梁紀昌尋日接受電台訪問時，表明反對依家通識科變成必修必考科目。佢話當年通識科唔係必考嘅，因為國際未必認可，例如牛津收生都唔會考慮學生通識科嘅成績。佢又批評，通識科嘅問題係「教嘅唔識教；考嘅唔識考；讀嘅唔識讀」，完全係「吹水科」，唔理觀點啱定錯，多觀點就拎到高分根本唔合理。

梁紀昌

梁紀昌又認為依家部分國民教育同通識科嘅內容對初小學生嚟講太深，佢哋未必可以深入理解同分析，「因為小朋友只係成年人嘅錄音機」。以民族節日課題為例，喺初小學生嘅角度，淨係知有嘢食同有新衫着，所以通識科嘅課程內容應該因應時勢而變咁話喎。

第一手消息請下載on.cc東網iPhone/iPad/Android/Windows Phone Apps