設計圖片及對白
白鴿黨將會喺下月改選中委，亦會選出新一屆嘅正、副主席。而喺一二年曾經挑戰現任白鴿黨主席劉慧卿同該黨立法會議員「單雞」單仲偕出選主席嘅黨內乳鴿、南區區議員區諾軒就有意再度參選主席。區諾軒仲話為咗要令選舉有競爭，黨內都有幾位前輩支持佢參選。不過，如果卿姐角逐連任，相信區諾軒都係陪跑居多，支持乳鴿參選只不過係黨內老鴿所搞嘅一場「撞牆」嘅樣辦戲啫！
蔡耀昌心灰萌退意
兩年前區諾軒同單雞競逐白鴿黨主席一職，點知就被卿姐後來居上，成為該黨首位女主席。當年越級挑戰失敗嘅區諾軒就話，今年佢有意再度參選，因為黨內要年輕化，亦要一場有競爭嘅選舉，所以佢會繼續參選。佢仲話近日已經籌備緊政綱，仲會搵黨內「三山五嶽之人」提名，強調今次係好認真咁話。
卿姐就話，自己係咪角逐連任仲要睇下黨員對佢呢兩年做主席嘅評價，但對於區諾軒參選叫好，仲話最好有多啲黨員出來參選，有競爭係件好事喎。
雖然有乳鴿唔怕陪跑，但黨內亦有人心灰意冷。據聞該黨副主席蔡耀昌多年嚟未能再上一層樓，加上因為幫新移民爭取申請綜援毋須居港滿七年一事而被「本土派」批評，所以令佢萌生退意，都唔打算連任副主席喇！蔡耀昌就話仍未決定係咪連任，要睇下有冇時間兼顧工作先得，又話如果有比佢合適嘅人出選，佢都會支持對方咁話。
第一手消息請下載on.cc東網
