考考大家︰點解香港會叫做香港呢?有一個主流嘅講法:從明代開始,呢度已經係盛產各種香料嘅地方,「香港」即係運送香料嘅港口咁解,而作為其中一種最主要香料,土沉香更加有「祖先樹」之稱。可惜吖,祖先無罪,懷璧其罪,土沉香有價有市,惹嚟非法斬樹黨垂涎,呢種珍貴樹木已經危在旦夕。

非法砍伐土沉香問題到底有幾嚴重?漁護署數字顯示,舊年共錄得九十六宗非法砍伐土沉香個案,比前年勁升超過四成,亦創下近三年新高。本報記者去大埔林村睇過,嗰度有近百棵土沉香被斬斷,令人觸目驚心。據了解,斬樹黨愈來愈狡詐,有分工有合作,作案前會事先「踩線」,然後喺目標樹上綁上絲帶,等同黨依標記做嘢,問你服未。

即係咁,蝕本生意冇人做,殺頭生意有人做,近年土沉香被熱炒,一克索價可高達八百蚊人仔,分分鐘拍得住黃金同鑽石,聲稱有售本港野生土沉香嘅內地網店就有近四十間,巨利當前,斬樹黨梗係去到盡,斬得就斬啦。當然啦,如果唔係當局執法不力,關人個關,賊人又點會咁肆無忌憚吖。一方面係非法砍伐個案連年上升,另一方面當局檢控數字不升反降,唔怪得不法之徒有恃無恐啦。

老實講,官方公布嘅數字,可能只係冰山一角咋。有關注團體估計,過去四年本港有過千棵土沉香被非法砍伐;保育人士更踢爆,當局執法鬆到冇朋友,以前報警話有斬樹黨,根本冇人理,近年話就話重視咗,但巡查人手仍然嚴重不足,更遑論設立專責隊伍執法。仲有吖,漁護署人員淨係朝九晚五巡郊野公園,警方又等到接報至做嘢,變相預留大量時間畀斬樹黨作案,話當局助紂為虐,一啲都冇講錯o架。

冇符啦,當局護樹不力,祖先樹瀕臨絕種,市民惟有自發護樹。呢,有保育人士透過網絡組織捉斬樹賊敢死隊,呼籲行山人士主動舉報懷疑個案,效果相當唔錯o架,好似今年九月就成功協助警方拘捕兩個斬樹賊。保護土沉香,人人有責,但要市民做埋當局嗰份,官僚知唔知醜字點寫吖。

唉,家陣香港係多事之秋,位於鴨脷洲洪聖古廟嘅「定海神針」早排被颱風吹斷,已經係不祥之兆,如果加埋「祖先樹」滅絕,香港再無「香」可言,香港福地真係要一鋪清袋o架,叮!

第一手消息請下載on.cc東網iPhone/iPad/Android/Windows Phone Apps