城中鏡：小明辦澳洲簽證上錯「釣魚」網
互聯網確實好方便，但網上騙局層出不窮，隨時殺你一個措手不及。唱《小明上廣州》等一系列兒歌聞名嘅李家仁醫生「小明」日前亦不幸中招。話說佢喺網上辦理澳洲簽證，點知上錯咗一個釣魚網站，輸入晒啲個人資料不特止，仲畀人呃咗幾十蚊，好彩並唔係乜嘢大數目，惟有當買個教訓，下次小心啲。
李家仁不慎「中招」後，即時取消咗張信用卡，以免被騙徒盜用。（資料圖片）
事緣小明喺網上搜索辦理澳洲簽證嘅網站，搜尋結果顯示置頂嘅網站名為EasyETA Australia Visa，佢見價錢只需九點九五澳元，比平日便宜時，已有啲起疑，但見網站指二十四小時後就能辦妥簽證云云，便繼續填表、付款。直到二十四小時後到機鐵站預辦登機服務時，先發現中咗伏，簽證根本冇辦好。幸得職員協助下，馬上喺正確網站辦理相關手續，簽證仲即時生效，收費應為二十澳元。
跟住小明即刻打去銀行取消張信用卡，因為被騙幾十元事小，但信用卡資料被盜用就大件事。佢仲話以後上網買嘢，最好用啲信用額少啲嘅信用卡，一旦畀人呃都冇咁肉痛嘛！
