近年嚟興起太空遊,刺激度爆燈,但日前一艘載人的商用太空船出師未捷,爆炸解體,嚇到想報名嘅富豪急煞停。保良局前日喺沙田馬場舉行紀念盃賽,多位董事局及城中名人現身支持。講到太空飛船載人不成,反成死亡陷阱,個個都話命仔緊要,就算飛天可圓太空夢,都係咪搞。

鄭錦鐘憧憬有天可飛上太空觀光。

陳正欣(右)及太太Angel(左)一齊入場玩。

李文斌笑言唔值得搵命博上太空。

李文斌:命仔緊要

仁濟醫院董事局前主席李文斌話上太空玩,最多咪睇到幾粒星星,命仔緊要,就算有得報名,佢都無興趣。馬會大董陳南祿亦耍手擰頭,笑稱地下都未行完,更何況上太空?莎莎太子女郭詩慧都係安全第一,話依家去旅行,都會帶囝囝喺身邊,如果上太空咁多未知因素,佢當然唔想個仔陪住冒險。

不過,心口寫個勇字嘅大有人在。保良局前主席Eric鄭錦鐘笑笑口話未驚過,仲話以前啲人連坐飛機都話唔安全,依家咪一樣四圍飛。佢認為科技日新月異,終有一日會搵到安全嘅升空方法,到時一定會約埋太太,一齊感受在太空任我行嘅無重狀態喎。

保良局總理Daniel陳正欣都有入場,講起零售市道受佔領行動重創,經營鐘錶同時裝生意嘅Daniel大嘆無奈。佢話香港營商環境一向好穩定,無諗過一場佔領令商界信心跌至低點。佢話有商家朋友感嘆香港營商遊戲規則已被破壞,風氣持續下去,恐引發轉投亞洲其他國家嘅「棄港潮」。

第一手消息請下載on.cc東網iPhone/iPad/Android/Windows Phone Apps