政壇：搞搞政：白鴿黨 公文袋驚輸 泛民「辭職公投」內訌

本來無論係超級區議員辭職定五區總辭都無乜分別，但由於大家都想喺議會保住話事權，兩黨於是不斷放風，猛話由對方辭職好過自己辭職。

白鴿黨有兩名超級區議員，公文袋就喺五區都有議席。公文袋黨魁梁家傑話如果要五個直選議員辭職，將會令泛民喺地區直選失去否決權。白鴿黨單仲偕就話，如果由超級區議員辭職，二十幾萬傳統功能組別選民就無得藉公投表達意見，所以五區總辭較為可取。

「長毛」允不搶閘辭職

對於白鴿黨用傳統功能組別選民無得投票呢招「耍太極」，有公文袋中人就提出另一條好橋，就係當超級區議員辭職、政府定出補選日期後，泛民可委託港大民意研究計劃總監鍾庭耀喺同日搞民間公投，等無份投票嘅傳統功能組別選民有得同時表態。梁家傑早前接受查詢時，認為建議不失為一個好辦法，會喺飯盒會提出等大家討論。

不過，泛民尋日再開飯盒會討論辭職公投問題，結果都係得個吉。雖然傾足成個星期都無料到，但據聞泛民喺會上力勸支持辭職公投嘅社民連「長毛」梁國雄，唔好搶閘辭職，費事令其他泛民唔知跟唔跟住辭職好。見到其他泛民朋友淨係識噴口水花，「長毛」都無佢哋咁好氣，惟有承諾唔會喺泛民有決定前偷步辭職喇！