政壇：電商促銷無得叫「最低價」

「光棍節」促成嘅網購超級多，消費者對假打折的投訴亦持續增加，國家工商局近日約見馬雲揸fit嘅阿里巴巴、劉強東做行政總裁嘅京東、蘇寧以至外資亞馬遜商城等十家電商公司，想防止電商平台，喺「光棍節」嘅促銷中，進行虛假宣傳。

工商局除明確禁止「最低價」促銷外，亦表示注意到行業中，有經營者以虛假交易、刪除不利評價、甚至惡意損害同業信譽嘅方式，以提升本身嘅客戶口碑。

在競爭劇烈下，電商公司以較為出位手段宣傳，有時確係無可厚非，但如果規管部門唔出手強調一下「市場秩序」，「光棍節」隨時變成「老襯節」，變成推動內需嘅反效果！

講開阿里，佢哋會喺今晚公布上市以來嘅首份季度業績，市場估計阿里嘅平均盈利有望超過七十一億元人民幣，按年升幅大約係百分之二十一。阿里對「光棍節」嘅促銷部署，肯定繼續會成為投資市場嘅關注重點。