政壇：胡志偉九比○輸畀樹根
為咗配合佔領行動，二十三名泛民主派立法會議員早前講明喺議會內會進行全面不合作運動，但勢估唔到唔止對外不合作，連對內都唔係好合作。話說尋日立法會房屋事務委員會選舉副主席，候選人係建仔嘅鍾樹根同埋白鴿黨嘅胡志偉，點知胡志偉自己都唔知「被提名」，結果最終以直落九比○輸畀樹根，胡志偉足足食咗九隻蛋，被極速KO，唔知今次事件係咪證實到泛民內部溝通真係有問題呢？
設計圖片及對白
由於房屋事務委員會喺上次會議選舉正副主席，但係選咗工聯會嘅麥美娟做主席之後，由於時間唔夠，所以副主席嘅選舉就留待下次會議，即係尋日嘅會議進行。
胡辯稱「唔知被提名」
委員會有二十二位成員，泛民同建制各有十一人，尋日有兩位建制派缺席，如果泛民全數動員，想搶贏副主席唔係大問題。點知尋日開會時頭五分鐘，一位泛民都唔見，結果九位出席議員全數投畀樹根。建制派明知贏硬，但都要玩到盡，竟然以「唱票」形式公布選舉結果，好彩現場無泛民議員，如果唔係都唔知搵邊個窿捐。
胡志偉事後話自己完全唔知道「被提名」，又話自從泛民宣布不合作運動後，其實已有共識，就係所有副主席都唔會競爭，任由建制派贏晒。但到底係邊位提名胡志偉？原來係公文袋嘅「袋巾傑」梁家傑，但「袋巾傑」明明唔喺會議廳，又點提名胡志偉？原來係上次開會時，「袋巾傑」已經提名咗胡志偉，但係到尋日先正式表決。
至於贏到開巷嘅樹根就話，自己都估唔到贏咁多，多謝泛民承讓喎。今次再次印證，泛民最大敵人係自己，唔係建制派囉！
