誰明老師心：真是荒謬，把通識看得那麼高
有議員向政府建議，檢討調整或刪減通識科課程中「法治和社會政治參與」涉及香港政治議題的內容，引發我們通識科友好的激烈回應。以下原文引錄以保留神髓：「削減內容對我地影響唔大喎。」阿遠說：「反正通識科內容本身就好虛，推出嚟嗰陣我哋反對過o架，政府唔聽之嘛，依家咪當係調整期囉！你估減咗啲內容，我哋就教唔到？呢個咁虛嘅課程咪又係我哋班前線絞盡腦汁諗下點樣具體教？」
「驚學生讀通識科會變得關心政治、好『激進』？」楊老師並非倒抽一口涼氣，而是深呼吸舉手做引號手勢：「真係多餘！邊關通識事？依家咁容易得到資訊，想認識一件事，撳個掣就得，佢哋睇FB、高登仲多過睇本通識書啦，隨時知得多過我哋添！」
「班政客見咁多學生支持佔領，又唔相信佢哋會獨立思考，總認為有人教唆煽動，於是搵通識嚟『祭旗』囉。」我笑說：「呢個時候向政府極高層『講呢啲』，實畀人話係政治原因郁通識，都唔知邊個諗條咁嘅屎橋，係都等第二輪中期檢討完咗先講啦。」
那些政客真荒謬，把通識看得那麼高。
