美酒佳餚雖吸引 奈何旺丁不旺財

一年一度嘅美酒佳餚巡禮原訂喺中環舉行，今年因為佔領運動阻頭阻勢而被迫移師啟德郵輪碼頭，不過一樣墟冚。好似九龍灣接駁車站咁吖，一個下晝就逼滿五、六百人，動輒等兩至三小時先上到車，市民亦毫無怨言。旅發局預計整個活動嘅總入場人次，比往年最少增加十四萬喎。

鬼咩，佔領運動搞到銅鑼灣、金鐘、旺角路路不通，市民始終需要娛樂。正如有入場市民話齋，每日充斥大量佔領負面新聞，搞到抖唔到氣，難得有好嘢食同靚酒飲，地點幾遠幾偏僻都好，好歹都要嚟湊吓熱鬧啦。

之不過咁，有人歡喜有人愁，今次人流係就係大大增加，可惜好睇唔好食，參展商冇乜實際得益呢。嗱，有清酒商大吐苦水，話連日來最貴一張單只係一萬五千元咁大把，平均消費大跌三成，同往年冇得揮。另一位賣德國冰酒嘅參展商就仲慘，人均消費勁跌一半，事關豪客冇影，市民齋試唔買，問你點頂。亦有參展商坦言往年做到廿幾萬生意，今年有十零萬都偷笑咯。

梗係啦，美酒佳餚巡禮以前喺中環及西九舉行，交通方便之餘，格調亦高得多，闊佬豪客先至賓至如歸吖嘛。今年唔同嘞，啟德郵輪碼頭交通配套不足，公眾泊位話咁快爆滿，唔通要豪客花幾小時逼巴士入嚟咩。所以話，港府搞郵輪碼頭搞到甩甩漏漏，天殘地缺，簡直唔衰攞嚟衰。

講開又講，交通不便都係其次，香港經濟前景一片灰暗先至係豪客卻步嘅真正原因。大家有眼見，經濟民生因為佔領而大受打擊，中央嘅「懲罰」措施又陸續有來，叫停旅行團及滬港通只係「前菜」咋。正如香港零售業管理協會話齋，佔領行動大大打擊市民嘅消費意欲，零售業首當其衝，好快步入寒冬。你知啦，買名酒無非為收藏升值，家陣咁嘅時勢，仲邊有人夠膽大手筆掃貨喎。

一句講晒，佔領搞到香港雞毛鴨血，日日嘈喧巴閉不特止，最慘係百業蕭條，經濟一池死水。唔通政治真係可以當飯食？到底佔領人士幾時先肯收手，還香港清靜吖，叮！